|
عديت راس أطول طوال المراقيب =مرقاب ظني ما حدن قد رقابه
وقامت هجوسي تسأل القلب ويجيب = حطتلها بين الحنايا حرابه
حار الطبيب يحلها بالتطابيب = وأسندتها على الورق والكتابه
وسميت بسم إلي علم خافي الغيب = سبحانه المعبود منزل كتابه
نركع ونسجد له بلا شكٍ وريب = ونرفع يدانا نطلب الاستجابه
بمره نقضي وقت معدود ونغيب = وبمره نغادرها ونسكن ترابه
عشت الحياه وشفت فيها التعاجيب = الوقت يمضي عجل محدن درابه
شفت العجايب قبل يبدي بي الشيب = من وقتنا إلي قام يقلب ثيابه
وحبيت أسطر من بيوتي تجاريب = للي يبي العليا بيوتي زهابه
قولٍ مؤكد ما دخل فيه تكذيب = ولا أقول قولٍ غير حاسب حسابه
أربع وصاياً موجزه مابها عيب = الفرق واضح بينها ما تشابه
الأوله أد الفرايض بترتيب = وأحرص على التقوى وكسب المثابه
والثانيه أحسن لوالديك وتصيب = درب الفلاح إلي سعد من مشابه
والثالثه رافق هل العرف والطيب = إلي على الطاله ينومس جنابه
والرابعه أحرص لفعل المواجيب = ومن واجب الرجال وصل القرابه
وأيضاً من المأجوب طيب التراحيب = للظيف عندك ظيفته والرحابه
هذي وصايا الطيب تمت بتأديب = وصلو على المبعوث وأرضو الصحابه
|
