|
شلت الثقايل لين تعبت عضودي=وشربت من كاس الزمان المراره
لا قلت راح الهم يمي يعودي=والحزن ماسك وسط قلبي خفاره
حظي تعكس ياعراب الجدودي=والحظ نكبه لا تغير مساره
والدمع مثل السيل فوق الخدودي=دمعٍ يعذب يوم سال بغزاره
واكبر قهر في ذا الزمان الحقودي=دمع الرجل لامن زاد انهماره
يالعنك يادنياً همومك تزودي=مدري لاعانةٍ طبع ولا شطاره
كني مقيد ياعرب بالقيودي=والصدر ثاير من لهيب الحراره
لا ياوجودي للهناء ياوجودي=لي عام ماجاني خبر بالبشاره
ماني من اللي يخلفون الوعودي=مير الزمان الشين قطاع اشاره
سجيت مع فكرٍ بليا حدودي=وشبيت بالكبريت راس الزقاره
ومشيت في درب الرجاء والصمودي=وتركت حب اشواق مع حب ساره
ماعاد ابا الا الحظ يرقى سنودي=ويصير متربع بعرش الصداره
ادعي واناجي خالقي في سجودي=انه يفرج ضيقتي بقتداره
|
