|
ياحظ قم قامت عليك القيامه=قم يا حلال القوم واصحا من النوم
قم خل عنك الدنفسه والرخامه=وادفع ثمن مافات يوم وري يوم
اليا متي وانته بريع الندامه=متلحف الخيبه ومتوسد الشوم
لابراك كي ولانفع بك حجامه=والشد الابيض مايقومك وتقوم
لاسانعت سقت الذلول بخطامه=ونعقت حدر اشدادها كنك البوم
ولانابني نايب عصبة العمامه=واعطيتني راسك مورد مع القوم
تفزع مفازيع الجهل والغشامه=وتعين من لانت بمعونته ملزوم
شمت في الحمره والهلامه=وعرضتني في سوق الايام للسوم
والحقتني شرهة عزيز وملامه=وانا الذي ماطيق شرهه ولالوم
وعزي لمن مثلي تراخا حزامه= وبالميسم الحامي علي الكبد ماسوم
ابغي السلامه مير مامن سلامه= تهجدني هموم وتصبحني هموم
ذودي علي الميراد طول حيامه=ولاشوف له في جم نضاح مقسوم
شد الرجا والياس بنا خيامه= اطنابها في جوفي ارماح وسهوم
ينقدني الي مايثمن كلامه= ولاجاه من دهر الدهر عج وسموم
ربوة عجوز ماسرا بالجهامه= وضيف العشا لاجاه ماذاق مطعوم
والي خلق عبده وركب عظامه=اني علي دنياي ماني بمنهوم
يسدني منها الحيا والكرامه = والعافيه والستر مادامت تدوم
ومقضا لزوم اهل الوفا والشهامه= اليا نصوني وجالهم عندي لزوم
هذا هوي بالي وهذا مرامه=ولوحال دون العلم ياعالم علوم
ويالله تحسن خاتمته وختامه= الي دعاك بقلب صادق ياقيوم
ويقوم حظه في نهار القيامه= مادامه بدنياه نام وشبع نوم
|
